နာမည်ကြီး ပေါ့ကတ်စ် ဂျာနယ်လစ် စာရေးဆရာ ဘန် ဟာ အချစ်ကို အယုံအကြည်မရှိဘဲ မိန်းကလေးတွေအများကြီးကို အပျော်တွဲတတ်တဲ့ လူတစ်ယောက်ပါ။ တစ်နေ့တော့ ညဘက်ကြီးသူ့ဆီကို ဖုန်းဝင်လာတယ်။ မင်းရဲ့ ရည်းစား အက်ဘ်လင်းသေပြီ ဈာပနကို လာပေးပါဆိုပြီး အက်ဘ် လင်းဆိုတဲ့မိန်းကလေးရဲ့အစ်ကိုက ဖုန်းဆက်လာတာပါ။ ဘန်က အက်ဘ် လင်းနဲ့ ၃ခါလောက်ပဲချိန်းဖူးတာဖြစ်ပြီး စိတ်ထဲတောင် သိပ်အမှတ်တရ မရှိလှပါဘူး။ဒါပေမဲ့ အက်ဘ်လင်းရဲ့မိသားစုက သူ့ကို အရေးကြီးပုဂ္ဂိုလ်လို အရေးတကြီး ဖိတ်နေတဲ့အတွက် လိုက်သွားလိုက်ပါတယ်။ နေရာက‌တော့ တက္ကဆက် ပြည်နယ်ထဲကိုမှ အတော်ခေါ်တဲ့ နေရာပါပဲ။ အဲဒီဈာပနအပြီးမှာတော့ အက်ဘ်လင်းအစ်ကိုက သူ့ညီမသေတာဟာ လူသတ်ခံရတာဖြစ်နိုင်တယ်၊ လူသတ်တရားခံကို အတူရှာပြီးလက်စားချေဖို့ ဘန့်ကိုပြောပါတယ်။ ဘန်ကတော့ ဒီမိသားစုရဲ့ အူကြောင်ကြောင် ရိုးရှင်းပုံကိုသာ ဇာတ်လမ်းအသံ ဖမ်းပြီး ပေါ့ကတ်စ်လွှင့်လိုက်ရရင် အရမ်းပေါက်မှာပဲဆိုပြီး လူသတ်မှုဆိုတာ မယုံပေမဲ့ အလိုက်သင့်လိုက်စုံစမ်းလိုက်ပါတယ်။အဲဒီမှာ သူသိလိုက်ရတာက တကယ့်လူသတ်မှုဆိုရင်တောင် တက္ကဆက်မှာ ပေါ်ဖို့ခက်တယ်ဆိုတာပါပဲ။ တက္ကဆက်ရဲတွေအတွက် အရာရာဟာ မတော် တဆမှုပါပဲ။ သေနတ်မှန်သေလည်း သေနတ်မတော်တဆမှု၊ ဓားနဲ့ခုတ်လည်း ဓားမတော်တဆမှုပါပဲ ဘာမှထွေထူးလိုက်ရှာမနေပါဘူး။ ၉၁၁ ကိုဖုန်းဆက် ရင်လည်း သောက်ပေါလို့ပဲ မှတ်ကြပါတယ်။ ဒီလိုနေရာမျိုးမှာ ဘန်တစ်ယောက် အသံလွှင့်ဇာတ်လမ်းလေးအတွက်သက်သက် ဟန်ဆောင်ပန်ဆောင်နေရင်း လေးနက်တဲ့ဇာတ်လမ်းတွေ တကယ်ကြုံလာတဲ့အခါ…..