Shudder ရဲ့ V/H/S Franchise ကို ကြိုက်နှစ်သက်သူတွေအတွက် ၇ ကားမြောက်ဖြစ်တဲ့ V/H/S/Beyond က ယခုနှစ်မှာ ထွက်ရှိလာခဲ့ပါပြီ။ သူ့ရုပ်ရှင်တွေရဲ့ထုံးစံအတိုင်း found footage တွေကို စုစည်းထားတာဖြစ်ပါတယ်။ ဒီဇာတ်ကားမှာဆိုရင် “Abduction” “Stork” “Dream Girl” “Live and Let Dive” “Fur Babies” “Stowaway” ဆိုပြီး ဗီဒီယို ၆ ခုကိုမြင်တွေ့ရမှာပါ။ထွက်ပြီးသမျှ ရုပ်ရှင်တွေထဲမှာတော့ လေးကားမြောက်ဖြစ်တဲ့ V/H/S/94 က အပြုသဘောဆန်တဲ့ မှတ်ချက်အများဆုံး ရရှိထားပြီး လက်ရှိအချိန်ထိတော့ ယခုရုပ်ရှင်ကလည်း အပြုသဘောဆန်တဲ့ မှတ်ချက်တွေ ရနေဆဲပါ။ V/H/S ရဲ့ ထုံးစံအတိုင်း စိတ်အနှောင့်အယှက်ဖြစ်စရာ မြင်ကွင်းတွေ ပါဝင်တာကို သတိပြုပေးကြဖို့ တိုက်တွန်းလိုပါတယ်။“Abduction” ဆိုတဲ့ ခေါင်းစဉ်အောက်မှာတော့ – ၁၉၅၀ ပြည့်နှစ်လောက်မှာ တရုတ်လူမျိုး ရွှေ့ပြောင်းနေထိုင်သူတွေက တော်ရန်တိုကို ပြောင်းလာကြပြီး ပိုက်ဆံရှိတဲ့အတွက် အဲ့ဒီမှာအိမ်ကြီးတစ်လုံးကို ဝယ်ယူကာ နေထိုင်ခဲ့ကြပါတယ်။ နှစ်တွေကြာလာတော့ မိဘတွေက သေဆုံးသွားပြီး အိမ်ကြီးကိုတော့ သားအကြီးဆုံးကို အမွေအဖြစ် ပေးခဲ့ပါတော့တယ်။ သားအကြီးဆုံးက အိမ်ကိုရောင်းချဖို့လုပ်နေစဉ်အတွင်း အဲ့ဒီအိမ်မှာပဲနေထိုင်ခဲ့တာပါ။ ညဘက်ရောက်လာရင် ခြောက်လှန့်မှုတွေ၊ အိမ်ထဲကို ထူးဆန်းတဲ့ ကျူးကျော်ဝင်ရောက်မှုတွေခံစားလာရတဲ့အတွက် အဖြေရှာကြည့်ဖို့ရာ သူမအိပ်ခင် သူ့အိပ်ခန်းထဲမှာပဲ ကင်မရာ ၂လုံးကို တပ်ဆင်ခဲ့တဲ့အခါ …. များမကြာမီပါပဲ အဲ့ဒီသားအကြီးဆုံးကလည်း ပျောက်ချင်းမလှပျောက်ဆုံးသွားခဲ့ပါတယ်။သူနောက်ဆုံးရိုက်ခဲ့တဲ့ ဗီဒီယိုမှာ ဘာတွေပါနေမလဲ။ “Fur Babies” ဆိုတဲ့ နောက်ထပ်ဇာတ်လမ်းတစ်ပုဒ်မှာဆိုရင် – အိမ်မွေးတိရိစ္ဆာန်စောင့်ရှောက်ပေးရေးဂေဟာဖွင့်ထားတဲ့ အမျိုးသမီးတစ်ဦးက သူမရဲ့ ဂေဟာကိုကြော်ငြာထားတဲ့ ဗီဒီယိုကိုတင်လိုက်တဲ့အချိန် လူတစ်စုက သူမနောက်ဖက်က ရုပ်လုံးသွင်းထားတဲ့ခွေးလေးတွေကို ကြည့်ပြီး တရားမဝင်အလုပ်တွေကို လုပ်နေတာလားဆိုတာကို စုံစမ်းဖို့အတွက် သူငယ်ချင်း ၂ ယောက်နဲ့ ခွေးလေးတစ်ကောင်ကို လွှတ်လိုက်ပါတော့တယ်။ဟိုကိုရောက်သွားတဲ့အခါ သူမက သူမခွေးလေးတွေကို သေသွားပြီးနောက် မြေမမြှုပ်ပစ်ရက်လို့ ရုပ်လုံးသွင်းရတာပါလို့ ပြောပြီး ခွေးလေးတွေကို လေ့ကျင့်ပေးတဲ့ မြေအောက်ခန်းကို လိုက်ကြည့်ကြဖို့ ခေါ်သွားပြီးနောက် … ဘာတွေဆက်ဖြစ်မလဲ။ ကျန်တဲ့ ဗီဒီယို ၄ ခုမှာရော စိတ်ဝင်စားစရာ ဘယ်လိုအကြောင်းအရာမျိုး ပါဝင်မလဲဆိုတာကို ဆက်လက်ရှုစားလိုက်ပါဦး။